Spytt er ei væske som blir laga av eigne kjertlar i munnen. Spytt er som regel blankt og liknar vatn. Det inneheld i hovudsak vatn, salt og protein. Spyttet gjer at slimhinna i munnen er fuktig og glatt, og at maten blir lett å svelgje. Somme av proteina er òg med på å starte nedbrytinga av maten.

Kvar dag lagar eit menneske om lag 1 til 1,5 liter spytt. Det meste svelgjer ein, utan å tenkje på det. Når ein ser, luktar eller tenkjer på god mat, startar kjertlane å lage meir spytt. Det kjem av ein refleks.