Agurk er ein gammal kulturplante og har vore kjent som kjøkenvekst i over 3000 år. Den finst ikkje viltveksande, men stammar etter alt å dømme frå Nord-India der det veks nærståande artar. Den næraste slektningen er melon.

Agurk kom til Noreg midt på 1600-talet. Agurkplanten toler lite kulde og kan her i landet berre dyrkast utandørs i dei varmaste strøka. Produksjonen av agurk i drivhus har blitt veldig stor i Noreg, og det blir produsert om lag nok til å dekkje etterspurnaden i sumarhalvåret.

Agurkplantane er eittårige slyngplantar med slyngtrådar og store handflika blad som er femkanta i omriss. Dei gule kronblada er samanvaksne med fem flikar. Blomane er einkjønna. Hannblomane har fem pollenberarar som sit saman i opninga til blomen. Hoblomen er oversitjande i forhold til fruktknuten. Frukta er botanisk sett eit bær, det vil seie ei frukt med mange frø som ikkje sprekk opp for å spreie frøa.

Form og farge til frukta, agurken, varierer mykje mellom dei ulike variantane, men grunnforma er den same: ein ganske symmetrisk sylinder som kan vere oppsvulma hos nokon, men frøemna sit alltid inn mot midten av tverrsnittet. Agurkane er grøne i starten av fruktdanninga og dei fleste blir hausta grøne. Nokre sortar som blir hausta seinare i utviklinga kan vere gule ved hausting. Det finst òg variantar som har striper i gult, eller lys farge. Ein annan variasjon er strukturen til overflata; mange er glatte, men fleire variantar har piggar. Storleiken varierer frå eit par centimeter til rundt ein halv meter. Agurkane inneheld rundt 95 prosent vatn og dei har låg næringsverdi.

• graskarfamilien
• salat
• melon
• grønsaker