Vanleg kvede (Cydonia oblonga) er ein lauvfellande busk eller eit lite tre som blir opptil åtte meter høgt. Blada er eggeforma. Blomane er kvite til rosa, femtallege og har ein diameter på omtrent fem centimeter. Dei blomstrar tidleg om våren. Fruktene som blir utvikla er bæreple som er gule og lòdne. Dei er på storleik med grapefrukt. Vanleg kvede blir delt inn i to underartar etter fasongen på bærepla. Den eine underarten produserer frukter som har fasong som eple, medan den andre underarten produserer frukter som har pærefasong.

Fruktkjøtet på kvede er fast, velsmakande og rikt på pektin. Kjernehuset har brune frø med smak av bitre mandlar.

Vanleg kvede oppstod som art i Kaukasusområdet i Vest-Asia, og er tilpassa eit varmt og tørt klima. Frå opphavsområdet har kvede spreidd seg austover i Asia mot Himalaya og vestover til Europa. Kvede er seinare introdusert i Afrika, Amerika og i Oseania, der han blir dyrka.

Kvedetre kan vekse i dei varmaste strøka av Noreg, og er planta nokre stader som hagetre. Det er ingen kommersiell produksjon av kvede i Noreg.

Størstedelen av kvedeproduksjonen i verda skjer i Asia, men det blir òg og dyrka kvede i varme strøk i Europa, Amerika, Oseania og Afrika.

(Produksjontal for 2023, Kjelde: FAO Stat)

Frukta av kvede blir brukt til mat. Fruktene blir ikkje etne rå, men kan varmebehandlast og eignar seg mellom anna godt til sylting.

Kvedefrø, blad og frukter har blitt brukt innan tradisjonell medisin.

Unge kvedetre blir òg dyrka for å bli brukte som grunnstammar i pæredyrking, der pære blir poda på grunnstamma av kvede.

Frukta kvede inneheld cirka 15 milligram vitamin C, 201 milligram kalium, 83 prosent vatn og 285 kilojoule tilførte energi per 100 gram etande vare.

• rosefamilien