Tamasjek høyrer til den berberske (amazighiske) greina av den afroasiatiske språkfamilien.

Berbersk blir delt i nordberbersk (nordamazighisk), tamasjek, austberbersk (austamazighisk), zenaga og det utdøydde guanche (Kanariøyane).

Tamasjek blir delt i tre hovuddialektar, etter uttalen av språknamnet. Språket heiter tămašăɣt i Mali (bortsett frå i Menaka), tămažăɣt i Niger og Menaka (Mali) og tămahăɣt i Hoggar-fjella (Algerie). Men tămažăɣt kan delast i to klart skilde dialektar, den i Menaka og Nordvest-Niger og den i Aïr-fjella i Niger.

Tuaregane har sitt eige alfabet, tifinagh, tamasjek tifinɑɣ. Det har røter i gamalnumidisk skrift, som truleg blei laga i det 6. hundreåret før vår tidsrekning etter mønster av punisk, den fønikiske skrifta som blei nytta i Kartago frå det 9. til det 1. hundreåret før år 0. Berre konsonantane blir skrivne.

Tamasjek er eit VSO-språk – setninga har strukturen verb + subjekt + objekt (Ǝ er stor ǝ, substantiv har ikkje ubunden og bunden form):

Verbsuffikset ‑ɑ̆n viser at subjektet er hankjønn fleirtal. ‘Eg såg’ heiter ǝnhɑ̆yɑ̆ɣ. Verb med ɑ̆ i rota – som ǝnhɑ̆y‑ – viser til avslutta handling. Meddɑ̆n ‘menn’ er fleirtal av ɑ̆hɑlǝs ‘mann’.

Substantiv har oftast prefiks, som e‑ i ebɑ̆kɑ̆r 'vêrlam' (‘han-lam’). Fleirtal har ofte både prefiks og suffiks, som i‑ og ‑ɑn i ibǝkrɑn ‘fleire vêrlam’. Hokjønn eintal har oftast prefikset t‑ og suffikset ‑t lagde til hankjønn: tebɑ̆kɑ̆rt 'saulam' (‘ho-lam’), fleirtal tibǝkren. Ein lang prefiksvokal blir kort når substantivet er subjekt og står rett etter verbet. ‘Saulamma såg elefantane’ heiter Ǝnhɑ̆ynɑ̆t tǝbǝkren elwɑn, der tǝbǝkren er subjektforma av tibǝkren.

• berberske språk
• Språk i Afrika
• tuaregar

• Jeffrey Heath: A Grammar of Tamashek (Tuareg of Mali). (Mouton Grammar Library 35.) Mouton de Gruyter, Berlin/New York 2005