Säämi máttááttâskuávdáást Anarist láá taan-uv täälvi lovmat anarâškielâ lohhed aldamáttááttâsâst. Stuárráámus uási uáppein haalijd oppâđ kielâ tondiet, ko sii pirrâsist sárnuh ennuv anarâškielâ. Tuoivân lii, ete puátteevuođâst kielâ ij taarbâš molsođ suomâkielân. 

Anarâškielâ uáppee Jarmo Pyykkö lii aassâm perruinis jo 25 ihheed Anarist, já suu kálgu máttát vuáđuškoovlâst anarâškielân. 

– Masa jo puohah muu pirrâsist mättih anarâškielâ. Mun jiem haalijd leđe áinoo, kii ij määti, muštâl Pyykkö. 

Škovliittâs ohtâ mittostuálppu láá čohčâkuálástempeeivih Kuáskimnjaargâst. Uáppeeh ibbeerdškyetih já sárnuškyetih kielâ eenâb, já nuuvtpa tast ovdâskulâi máttááttâs kielân lii ain eenâb já eenâb anarâškielâ. 

Kuáskimnjaargâst kielâ lasseen uáppeeh uáppih meid anarâš kulttuurân tergâdis ääši, kuálástem. Anarâškielân kuálástem lii puohháid uđđâ feerim, mutâ meid hárjánâm kuálásteijeeh lijjii fáárust. 

Ruska Haavisto lii kielâtotkee Porist. Sun lii opâttâllâm paje- já maadâsämikielâ já lijkkoo sämikieláid. Kuálástem lâi sunjin aaibâs uđđâ äšši. 

– Taat lâi muu vuosmuš kerdi. Jiem haalijd älgiđ kuálásteijen, povvust Haavisto. 

Kuldâl lase Anarâš saavâid tääbbin.