Sámi Grand Prix vuoitit leat čielgán. Lávlunoasi vuittiiga Piera Eira feat. MÁIJÁ ja juoiganoasi vuittii OSCAAL.
Gilvvus lei dál vuosttaš háve vejolaš jienastit maid Suoma bealde.
Jienasteapmi rahppojuvvui dán artihkkalis lávvardaga diibmu ovdal njuolggosáddaga, diibmu 21.10.
Gilvu lágiduvvui Guovdageainnus, gos oktiibuot 12 artistta dahje joavkku lávkejedje lávddi ala ja gilvvohalle guovtti kategoriijas: árbevirolaš luohti ja modearna musihkka. Vuoitit válljejuvvojedje duopmárjienaid lassin maid álbmoga jienasteami vuođul.
Sámi Grand Prix čájehuvvui Yle Areenas ja Yle TV2-kanálas lávvordaga cuoŋománu 12. beaivve diibmu 22.10 rájes. Suomagillii gilvvu láidestii Xia Torikka. Njuolggosáddaga Guovdageainnu Báktehárji-arenas láidesteigga Maxida Märak ja Ole Máhtte Gaup.
Iežas jiellat artistta sáhtii jienastit sihke juoigan- ja lávlunoasis. Goabbáge kategoriijas sáhtii geavahit dušše ovtta jiena.
Oahpásmuva gilvvu artisttaide dás vuolábealde. Buot šuoŋaid beasat guldalit Spotifys.
Lávlunoasi finalisttat:
Hildá Länsman – ”Duodjemagiija”
Ohcejohkalaš artista ja juoigi Hildá Länsman šattai njealjádin jagi 2015 Ođđa musihka gilvvus Solju-joavkkuinis ja jagis 2021 son vuittii ovttas Lávrein Sámi Grand Prix gilvvu Jođi-šuoŋain. Dán jagi son máhccá lávddi ala iežas šuoŋain Duodjemagiija, mii muitala sámi duoji intensiiva proseassas.
– Duodji lea magihkalaš hommá – muhtumin measta viimmáskahtti!
AILO – ”Vijmak”
Julevsámegiela studeantta Ailo Thomassen, guhte geavaha artistanama AILO, álggahii iežas DJ-karrieara juo 15-jahkásažžan. AILO ovdanbuktá julevsámegillii šuoŋa Vijmak, mii muitala su moarsis. Go Ailo ovdanbuvttii šuoŋa man dagai norgalaš olmmáivuođakampánjii dovddai son bovdejumi.
– Musihkka lea iežas viiddideapmi. Dat lea giella man geavaha go sánit eai leat doarvái.
Elin & The Woods feat. Jörgen Stenberg – ”Máilbmi jorrá”
Lávlu Elin Kåven ja musihkkabuvttadeaddji Robin Lynch leaba loaiddastan ovttas Elin & The Woods -elektropopduon jagi 2015 rájes. Gilvvus sudno mielde lea ubmisápmelaš juoigi Jörgen Stenberg. Joavkku šuokŋa Máilbmi jorrá muitala nuppástusas, agálaš gierddus ja das, mo buot jorrá dego eallu Sámis.
– Lea hui earenomáš čuožžut dákkár lávddi nalde. Mii dovdat iežame lihkolažžan go beassat vásihit dan!
Piera Eira – ”Dálkkiid čađa”
Piera Eira loaiddastišgođii luđiin juo 16–17-jahkásažžan. Dálkkiid čađa -gilvošuoŋain son ovttastahttá luođi ođđaáigásaš musihkain. Duoddariid borggain inspirašuvnna ožžon šuokŋa lea čujuhuvvon buohkaide, geat vásihit váttes áiggiid muhto eai vuollán.
– Lean juoigan dan rájes go lean máhtán hupmat!
Jovnna Levi – ”Jovnna fra Tana”
Dáiddár ja ráppár John Levi Joks Vars geavaha artistanama Jovnna Levi ja lea vuosttaš háve lávdde alde. Son lea ráppen 8-jahkásačča rájes ja máhttá stoagadit sániiguin sihke dáro-, sáme- ja eaŋgalasgillii. Jovnna Levii ráppa leamašan álot vuohki ovdanbuktit iežas ja stuorra oassi su eallimis mánnávuođa rájes gitta otná beaivái. Go son čállá lyrihkaid son sihkkarastá, ahte juohke sánis lea mearkkašupmi, iige ráppe dušše ráppa dihte.
– Ráppa lea iešalddes dáidda. Munnje dat lea dat, mot sániin sáhttá dahkat diktendáidaga.
Sara Ajnnak – ”Biäggålmáj”
Lávlu ja lávllačálli Sara Ajnnak lea dahkan musihka lagabui 30 jagi. Su gilvošuokŋa Biäggålmaj muitala sámi biekka ja dálkki vuoiŋŋas ja gieđahallá maid rehálašvuođa alcces. Sámi Grand Prix -gilvvu bokte Sara Ajnnak háliida buktit ovdán sámi viisodaga boahttevuođa divrras fápmun.
– Dego biegga, de lea eallima geainnu váttis einnostit. Háliidan buktit doaivaga, čuovgga ja ilu, danin go dan mii dárbbašit, čuovgga seavdnjadii.
Juoiganoasi finalisttat:
OSCAAL – ”Sávrrimus”
Niels Ovllá Oslak Dunfjell lea journalista, govvejeaddji ja lávllačálli guhte geavaha artistanama OSCAAL. Son lea álot beroštan musihkas ja sus lea ovdanbuktinvásáhus rumbbuid čuojaheaddjin. Sámi Grand Prix -gilvvus son juoigá vuosttaš háve olbmuid ovddas. Son lea ožžon inspirašuvnna sámieatnama dáistalemiin ja geavaha luođi ávkin buktit dehálaš áššiid ovdán. Luđiin Sávrrimus son gudnejahttá máttuid geaid dihtii sámegiella ja kultuvra ellet dálá áiggis.
– Musihkkastiillaid seaguheapmi lea dehálaš.
Mathis A. Oskal – ”Mongolia gehččonat”
Guovdageaidnolaš boazodoalli Mathis A. Oskal lea juoigan olles eallima. Son lea šaddan dovddusin norgalaš tv-prográmmas Søringen og Samen mas son lea riiden bohccuin Mongolias. Luohti Mongolia gehččonat muitala dan vásáhusas ja das man seammalágan boazodoallu lea Mongolias ja Sámis.
– Luođi lean mánnávuođa rájes oahppan.
Heli Aikio – ”Kyelialmai”
Anáraš juoigi ja musihkkár Heli Aikio lea álot oaidnán musihka vearjun, mainna nannet sámi kultuvrra. Su debyhtta lávlun lei Sámi Grand Prixas jagis 2014, goas soai Jessika Lampiin vuittiiga lávlungilvvu Aila-duon. Livđe ealáskahttin lea Aikioi váimmuášši. Guollealbmá livđe, Kyelialmai, gieđahallá ráhkisvuođa.
– Bálkestan ráhkesvuođa fierpmi miehta Sámi.
Johan Anders Bær – ”Torill”
Juoigi Johan Anders Bær lea johtán miehtá máilmmi ja dahkan musihka juo badjel 30 jagi. Son lea juoigan juo ovdal go máhtii hállat. Sámi Grand Prixii son oassálastá dál goalmmát háve. Johan Anders Bær searvá gilvui go háliida ahte nuorat buolva beroštišgoahtá dološ luđiin – ja seammás son beassá maid suohtastallat. Son juoigá ieža neabi Torill, guhte lea nana olmmoš ja áimmahuššá iežas lagamuččaid.
– Musihkka ferte čuovvut luođi.
Lajla Renander – ”Plaave Guehperh”
Lajla Renander orru Praahkas ja lea mánáidgárdeoahpaheaddji, goarru ja gákkesgođđi. Son oassálastá gilvui boares sohkaluđiin, man su áhkku lea oahpahan áhkkubiiddásis badjel 25 jagi dassái. Luđiin Plaave Guehperh son háliida gudnejahttit iežas soga nissonolbmuid. Luohti muitala nuorain, geat merkkot misiid, ja álddu ja miesi deaivvadeamis.
– Gudnejahtán nissoniid iežan bearrašis geat leamaš dehálaččat boazodoalus.
Johan Ivvár Gaup – ”Linn Henriette”
Boazodoalli Johan Ivvár Gaup lea bajásšaddan musikálalaš bearrašis gos su lea birastahttán luohti. Son lea juo oktii vuoitán Sámi Grand Prix juoiganoasi jagis 2016. Dán jagi gilvvus son juoigá iežas eamida Linn Henriette guhte lea nana nisu ja bearraša geađgejuolgi.
– Dan maid mun duođaid háliidan lea lávddis guoimmuhit ja doallat konsearttaid maid eará guovlluin go Davviriikkain.
Beaiváduvvon 12.4. dii. 16.58: Lasihuvvon diehtu, ahte Heli Aikio ja Jessika Lampi Aila-duo vuittii SGP lávlungilvvu jagis 2014.
Beaiváduvvon 12.4. dii. 21.10. Jienasteapmi lasihuvvon.
Beaiváduvvon 12.4. dii. 23.29. Jienasteapmi giddejuvvon.
Beaiváduvvon 12.4. dii. 00.14 vuoitiid dieđuiguin.