Iomaíochas

Forléargas

Riamh anall, ba mhór-roinn tionsclaíochta, fiontraíochta agus nuálaíochta í an Eoraip, ós dual di í féin a athchruthú trí réabhlóidí tionsclaíocha agus teicneolaíochta, trí iomaíocht dhomhanda, agus de bharr mar a bhíonn athrú ag teacht ar an tsochaí féin.

Tháinig muid slán ó shuaitheadh na ndianghlasálacha agus muid níos láidre fós, sháraíomar géarchéim fuinnimh nach bhfacthas a leithéid riamh roimhe, agus bhaineamar é sin amach in éineacht le chéile a bhuí le hathléimneacht agus diongbháilteacht. Mar sin féin, ní mór borradh mór a chur faoinár n-iomaíochas anois. Tá an geilleagar domhanda ag athrú go tapa.

Ní mór dúinn gníomhaíocht chinntitheach a dhéanamh chun iomaíochas na hEorpa a chosaint agus a threisiú, agus i leith gníomhaithe domhanda eile, an rathúnais agus na cothroime freisin. Cuirtear tús leis sin tríd an ngnó a dhéanamh níos éasca agus níos tapúla, agus ár margadh aonair a dhoimhniú ar fud na n-earnálacha uile. Leis an gcompás iomaíochais, arb é an chéad mhórthionscnamh de chuid an Choimisiúin nua é, leagfar amach an obair a bheidh á déanamh againn amach anseo agus muid ag cur le tuarascáil Draghi.

Príomhfhigiúirí

50%

sciar na bhfoinsí in-athnuaite fuinnimh i nginiúint leictreachais sa chéad leath de 2024, an sciar is airde riamh

suas le €4 bhilliún

le haghaidh infheistíocht i dtaighde ar an intleacht shaorga agus i gcur in úsáid na hintleachta saorga don tréimhse 2024-2027

75.8%

an líon daoine idir 20 agus 64 bliana d’aois a raibh post acu sa dara ráithe de 2024, an líon is airde riamh

Cuspóirí

Cúrsaí gnó a éascú
chun fás eacnamaíoch a chothú
Comhaontú maidir le Tionsclaíocht Ghlan
chun tacú le tionscail iomaíocha an Aontais agus poist ardcháilíochta a chruthú
Geilleagar níos ciorclaí agus níos athléimní
chun aistriú go cleachtais táirgthe agus tomhaltais níos inbhuanaithe
Borradh a chur faoin táirgiúlacht trí scaipeadh na teicneolaíochta digití
chun iomaíochas an Aontais a neartú agus a bheith ar thús cadhnaíochta i nuálaíocht na hintleachta saorga
Taighde agus nuálaíocht a chur
i gcroílár ár ngeilleagair
Borradh as cuimse a chur faoin infheistíocht
chun dlús a chur leis an aistriú glas, digiteach agus sóisialta
Dul i ngleic leis na bearnaí scileanna agus saothair
chun gairmeacha agus iomaíochas eacnamaíoch daoine a fheabhsú

An chaoi a mbainfimid ár gcuspóirí amach

Sna blianta beaga amach romhainn, chun iomaíochas agus rathúnas na hEorpa a chinntiú, déanfaimid an méid seo a leanas:

Cúrsaí gnó a dhéanamh níos éasca agus níos tapúla

Chun ár n-iomaíochas a fheabhsú, déanfaimid:

compás iomaíochais a thabhairt isteach chun an bhearna nuálaíochta a dhúnadh, chun dícharbónú a dhéanamh agus chun an tslándáil a mhéadú
an margadh aonair a thabhairt chun críche i bpríomhearnálacha chun go mbeidh cuideachtaí in ann uas-scálú a dhéanamh
cur chuige nua i dtaca le beartas iomaíochta a chur i bhfeidhm
an t-ualach riaracháin a laghdú agus oibleagáidí tuairiscithe a laghdú 25% ar a laghad agus 35% ar a laghad i gcás FBManna
tástáil struis a dhéanamh ar acquis an Aontais agus tograí a dhéanamh chun reachtaíocht a shimpliú agus a chódú le forluí agus contrárthachtaí a dhíothú, agus ardchaighdeáin á gcoinneáil ag an am céanna
stádas dlíthiúil uile-Aontais nua a mholadh chun cabhrú le cuideachtaí nuálacha fás
seiceáil nua FBM agus iomaíochais a thabhairt isteach le cabhrú chun ualach riaracháin nach bhfuil gá leis a sheachaint
a mholadh go ndéanfaí athnuachan ar an gcomhaontú idirinstitiúideach maidir le simpliú agus reachtóireacht níos fearr

Comhaontú nua maidir le Tionsclaíocht Ghlan a fhorbairt

Chun leanúint de shaothrú na spriocanna atá leagtha amach sa Chomhaontú Glas don Eoraip, chun ár ngeilleagar a dhícharbónú agus chun praghsanna fuinnimh a laghdú, déanfaimid an méid seo a leanas:

Comhaontú maidir le Tionsclaíocht Ghlan a chur i láthair chun ár dtionscal a dhéanamh iomaíoch agus poist ardcháilíochta a chruthú
a mholadh go leagfaí amach sprioc maidir le laghdú 90% ar astaíochtaí do 2040 sa Dlí Aeráide Eorpach
tacú le tionscail agus le cuideachtaí an t-aistriú a dhéanamh trí ghníomh um dhlús a chur leis an dícharbónú tionsclaíoch a sheoladh, rud a chuideoidh chun dlús a chur le pleanáil, tairiscint agus ceadú gaolmhar
costais fuinnimh a laghdú do theaghlaigh agus do ghnólachtaí tríd an aontas fuinnimh a thabhairt chun críche
infheistíocht a dhéanamh i mbonneagar agus i dteicneolaíochtaí fuinnimh ghlain
ár sásra um éileamh comhiomlán a ghníomhachtú agus a leathnú chun níos mó ná an gás amháin a chumhdach, agus hidrigin agus amhábhair chriticiúla a chuimsiú
soláthairtí amhábhar, fuinnimh ghlain agus teicneolaíochta glaine a dhaingniú trí chomhpháirtíochtaí trádála agus infheistíochta glaine a fhorbairt
leanúint de bheith ar thús cadhnaíochta san idirbheartaíocht idirnáisiúnta maidir leis an aeráid
taisteal d’iarnród a spreagadh agus rialachán maidir le háirithint agus ticéadú aonair digiteach a mholadh, chun a chinntiú gur féidir le muintir na hEorpa ticéad aonair amháin a cheannach ar aon ardán amháin agus cearta paisinéirí a fháil dá dturas iomlán

Oibriú i dtreo geilleagar níos ciorclaí agus níos athléimní

Chun aistriú go patrún níos inbhuanaithe táirgthe agus tomhaltais, agus luach na n-acmhainní inár ngeilleagar a choinneáil ar feadh tréimhse níos faide, déanfaimid an méid seo a leanas:

cuidiú chun éileamh an mhargaidh a chruthú ar ábhair thánaisteacha agus margadh aonair do dhramhaíl a chruthú trí ghníomh nua um an ngeilleagar ciorclach
pacáiste nua do thionscal na gceimiceán a chur ar aghaidh, lena dtabharfar soiléireacht maidir le ‘buancheimiceáin’, nó PFASanna
oibriú chun aontas sláinte na hEorpa a chur i gcrích, slabhraí soláthair a éagsúlú, rochtain ar na cóireálacha is forbartha a chothú, agus earnáil na sláinte agus na cógaisíochta a dhéanamh níos athléimní
obair a dhéanamh chun spleáchais ar chógais leighis chriticiúla agus ar chomhábhair chriticiúla a laghdú trí ghníomh um chógais chriticiúla a chur chun cinn
dlús a chur lenár gcuid oibre ar shláinte choisctheach, go háirithe maidir leis an meabhairshláinte, le galair chardashoithíocha agus le hailse, chomh maith le cóireálacha le haghaidh tinnis mheathlúcháin agus taighde ar uathachas
slándáil ár gcóras cúraim sláinte a chosaint trí phlean gníomhaíochta Eorpach a mholadh maidir le cibearshlándáil ospidéal agus soláthraithe cúraim sláinte

Borradh a chur faoin táirgiúlacht trí scaipeadh na teicneolaíochta digití

Open Doors Day at the European Institutions

Chun táirgiúlacht a mhéadú trí theicneolaíochtaí digiteacha a scaipeadh, déanfaimid an méid seo a leanas:

infheistíochtaí i mbonneagair dhigiteacha a spreagadh chun feabhas a chur ar an rochtain ar nascacht shlán thapa iontaofa
leanúint de dhlús a chur lenár bhforfheidhmiú ar dhlíthe digiteacha an Aontais
dul i ngleic le dúshláin a bhaineann le hardáin ríomhthráchtála
dlús a chur leis an infheistíocht sa tsár-ríomhaireacht, i leathsheoltóirí, in Idirlíon na Rudaí Nithiúla, sa ghéanómaíocht, sa ríomhaireacht chandamach agus sa teicneolaíocht spáis
rochtain ar acmhainneacht sár-ríomhaireachta a chinntiú do ghnólachtaí nuathionscanta agus do thionscal na hintleachta saorga trí phlean gníomhaíochta na mór-roinne maidir leis an intleacht shaorga
borradh a chur faoi úsáidí tionsclaíocha nua na hintleachta saorga agus seirbhísí poiblí a fheabhsú le straitéis um chur i bhfeidhm na hintleachta saorga
ár n-acmhainní uile a chomhthiomsú trí Chomhairle Eorpach nua um Thaighde ar an Intleacht Shaorga
comhroinnt sonraí éasca ar scála a chinntiú le straitéis um aontas sonraí Eorpach

Taighde agus nuálaíocht a chur i gcroílár ár ngeilleagair

Chun iomaíochas na hEorpa a fheabhsú agus chun í a chur i dtreo ré nua nuálaíochta agus seiftiúlachta, cuirfimid an taighde, an nuálaíocht, an eolaíocht agus an teicneolaíocht i gcroílár ár ngeilleagair. Déanfaimid an méid seo a leanas:

caiteachas taighde a mhéadú chun díriú níos mó ar thosaíochtaí straitéiseacha
an Chomhairle Eorpach um Thaighde agus an Chomhairle Nuálaíochta Eorpach a leathnú
é a dhéanamh níos éasca agus níos tapúla an bhith-theicneolaíocht a thabhairt ón tsaotharlann chuig an margadh le gníomh Eorpach um an mbith-theicneolaíocht
tacú leis an aistriú glas agus leis an aistriú digiteach agus teicneolaíochtaí ardluacha a fhorbairt trí straitéis um eolaíochtaí beatha na hEorpa
comhar idir ranna taighde, an t-ardoideachas agus gnó a fheabhsú trí chomhaontais ollscoile a neartú

Borradh as cuimse a chur faoin infheistíocht

Déanfaimid infheistíocht ollmhór inár n-iomaíochas inbhuanaithe trí infheistíocht phoiblí a úsáid chun caipiteal príobháideach a ghiaráil agus a dhí-rioscú. Déanfaimid an méid seo a leanas:

bearta ionsúcháin riosca a chur chun cinn chun é a dhéanamh níos éasca do bhainc thráchtála, d’infheisteoirí agus do chaipiteal fiontair cuideachtaí atá ag fás go tapa a mhaoiniú
athbhreithniú a dhéanamh ar ár rialacha chun aghaidh a thabhairt ar bhacainní a chuireann srian ar an méid caipitil Eorpaigh atá ar fáil chun an nuálaíocht a mhaoiniú
coigilteas príobháideach a ghiaráil chun infheistíocht a dhéanamh sa nuálaíocht agus sna haistrithe glana agus digiteacha trí aontas coigiltis agus infheistíochta Eorpach a bhunú
rialacha soláthair phoiblí a athbhreithniú chun gur féidir tús áite a thabhairt do tháirgí Eorpacha le haghaidh earnálacha straitéiseacha áirithe
teicneolaíochtaí straitéiseacha a fhorbairt agus iad a mhonarú san Eoraip trí chiste Eorpach um iomaíochas a bhunú, rud a thacóidh freisin le Tionscadail Thábhachtacha Leasa Choitinn

Dul i ngleic leis na bearnaí scileanna agus saothair

Chun gairmeacha daoine agus ár n-iomaíochas eacnamaíoch a fheabhsú, déanfaimid an méid seo a leanas:

aontas scileanna a bhunú a dhíreoidh ar infheistíocht, ar fhoghlaim ar feadh an tsaoil agus ar choinneáil scileanna
oibriú chun bunscileanna a fheabhsú
plean straitéiseach oideachais ETIM a mholadh chun aghaidh a thabhairt ar mheath feidhmíochta, ar an easpa múinteoirí cáilithe i réimsí a bhaineann leis an eolaíocht, leis an teicneolaíocht, leis an innealtóireacht agus leis an matamaitic (ETIM) agus níos mó cailíní a thabhairt isteach in oideachas agus i ngairmeacha ETIM
gairmoideachas agus gairmoiliúint a chur chun cinn le straitéis Eorpach le haghaidh gairmoideachais agus gairmoiliúna
borradh a chur faoi mhaoiniú scileanna i mbuiséad an Aontais agus é a athdhíriú
aitheantas scileanna trastíre a chinntiú trí thionscnamh um inaistritheacht scileanna a chur chun cinn agus leanúint de bheith ag obair i dtreo céim Eorpach

An dul chun cinn go dtí seo

Monatóireacht a dhéanamh ar dhul chun cinn tionscnamh nua, dlíthe atá beartaithe agus athruithe reachtacha faoin tosaíocht seo, iad a leanúint agus coinneáil cothrom le dáta leo

Iúil 2025
Cuireadh plean gníomhaíochta i láthair don tionscal ceimiceán chun iomaíochas agus nuachóiriú na hearnála sin a neartú
Seoladh straitéis chun go mbeidh an tAontas ar an áit is tarraingtí ar domhan ó thaobh eolaíochtaí beatha de faoi 2030
Seoladh an straitéis chandamach chun ceannaire candamach a dhéanamh den Eoraip faoi 2030
Meitheamh 2025
Mhol an Coimisiún Gníomh an Aontais um Spás chun earnáil spáis na hEorpa a dhéanamh níos glaine, níos sábháilte agus níos iomaíche
Bealtaine 2025
Cuireadh straitéis uaillmhianach i láthair chun go mbeidh an Eoraip ina lárionad cumhachta do ghnólachtaí nuathionscanta agus gnólachtaí atá ag méadú
Seoladh an tionscnaimh ‘Roghnaigh an Eoraip don Eolaíocht’ chun na daoine tréitheacha is fearr a mhealladh agus a choinneáil
Cuireadh straitéis i láthair chun margadh aonair na hEorpa a dhéanamh níos simplí, níos rianúla agus níos láidre
Chuir an Coimisiún i láthair treochlár REPowerEU chun neamhspleáchas iomlán fuinnimh an Aontais ar an Rúis a chinntiú
Aibreán 2025
Cuireadh i láthair plean gníomhaíochta na mór-roinne um an intleacht shaorga chun an chéad chéim eile den intleacht shaorga san Eoraip a mhúnlú
Márta 2025
Seoladh an plean gníomhaíochta tionsclaíochta d’earnáil mótarfheithiclí na hEorpa
Cuireadh i láthair an plean gníomhaíochta chun tionscal cruach agus miotal atá iomaíoch agus dícharbónaithe a chinntiú
Chuir an Coimisiún i láthair an straitéis um an aontas coigiltis agus infheistíochta chun deiseanna airgeadais a fheabhsú do shaoránaigh agus do ghnólachtaí
Feabhra 2025
Seoladh tionscnamh InvestAI chun infheistíocht €200 billiún san intleacht shaorga a shlógadh
Cuireadh i láthair an chéad phacáiste tograí chun an rómhaorlathas a laghdú agus an timpeallacht ghnó a shimpliú
Glacadh an plean gníomhaíochta um fhuinneamh inacmhainne chun costais fuinnimh a laghdú do theaghlaigh agus do thionscail
Seoladh an Comhaontú maidir le Tionsclaíocht Ghlan ar mhaithe le hiomaíochas agus dícharbónú an Aontais
Eanáir 2025
Seoladh an t-idirphlé straitéiseach maidir le todhchaí an tionscail mótarfheithiclí
Cuireadh i láthair an compás iomaíochais chun borradh a chur faoi rathúnas inbhuanaithe an Aontais

I lár an aonaigh

Plean an Aontais chun a thionscal cruach a chosaint ar ró-acmhainneacht dhomhanda

7 Deireadh Fómhair 2025 – Tá plean curtha chun cinn ag an gCoimisiún chun earnáil cruach an Aontais a chosaint ar thionchair éagóracha na ró-acmhainneachta domhanda. Is céim bhunriachtanach é an togra chun todhchaí na hearnála ríthábhachtaí sin a dhaingniú, d’fhonn poist an Aontais a chosaint agus tacú leis an earnáil ina hiarrachtaí dícharbónaithe. Tiocfaidh sé in ionad bheart coimirce cruach an Aontais atá le dul in éag i mí an Mheithimh 2026, rud a thabharfaidh cosaint láidir bhuan do thionscal cruach an Aontais.

Tuilleadh eolais