Paraguay har eit landareal som er noko større enn Noreg. Den nord-sørgåande Paraguay-elva deler naturleg landet i to geografiske hovudregionar med ulik topografi og geologi. Oriental-regionen i aust (også kalt Paraneña-regionen) består av kupert terreng med fruktbart jordbruksland og skog. I den vestlege Occidental-regionen (også kalt Gran Chaco) ligg det tynt befolka området El Chaco, som er eit ugjestmildt slettelandskap med ei blanding av sumpområde, krattjungel og semi-ørken.

Klima i Paraguay går frå subtropisk til tropisk, og har ein våt og ein tørr sesong. Nedbørsmengdene varierer kraftig ulike stader i landet, med mest regn i den austlege Oriental-regionen. Det siste tiåret har Paraguay fått merke klimaendringane i verda, med ei auke i periodar med kraftig regnfall og store og øydeleggande flaumar.

Plantelivet i Paraguay varierer stort mellom dei to hovudregionane i landet. Dyrelivet i Paraguay er rikt. Landet har rundt 650 fugleartar, ulike reptilar og ein rik fiskefauna i elvene.

• Les meir om Paraguay sin geografi, Plantelivet i Paraguay, Klima i Paraguay og Dyrelivet i Paraguay.

Folketalet var i 2023 i overkant av 6,8 millioner. Hovuddelen av befolkninga bur i den sørlege delen av landet. Paraguay har ein ung befolkning med ein gjennomsnittsalder på 31,8 år (2024). Forventa levealder ved fødsel er 81,6 år for kvinner og 76,2 år for menn (2024).

95 prosent av befolkninga i Paraguay er av blanda spansk og guaraní avstamming. Både spansk og guaraní er offisielle språk. Den dominerande religionen i Paraguay er kristendom; 94,1 prosent er kristne. Katolikkar utgjer 80,4 prosent, protestantar 7,0 prosent og andre kristne 6,7 prosent (2023).

Befolkningstettleiken er låg, og busetnadsmønsteret særs ujamnt. Mesteparten bur i Oriental-region av landet, nær hovudstaden Asunción. Occidental-regionen, som utgjer 60 prosent av territoriet, er bustad for mindre enn to prosent av befolkninga. I eit historisk perspektiv har Paraguay hatt den lågaste urbaniseringsgraden blant dei latinamerikanske landa. Urbaniseringsgraden var på 63,1 prosent i 2023.

• Les meir om befolkninga i Paraguay.

Paraguay er ein konstitusjonell republikk. Landet fekk ny grunnlov i 1992 som skulle sikre demokratisk maktfordeling og sivile rettar. Presidenten er både statsoverhovud og regjeringsoverhovud med den utøvende makta. Presidenten blir vald for fem år av gongen, og kan ikkje veljast på ny. Paraguay har eit fleirpartisystem, og dei tradisjonelt største politiske partia i landet er Coloradopartiet (ANR) og Dei liberale (PLRA).

Ved presidentvalet 21. april 2013 blei Coloradopartiet sin kandidat Horacio Cartes vald som ny president. Hans partifelle Mario Abdo Benítez vann valet i 2018.

Det paraguayanske forsvaret består av hæren, marinen og flyvåpenet. Paraguay sine internasjonale relasjoner har historisk sett vore nært knytte til USA.

• Les meir om det politiske systemet i Paraguay, Det paraguayanske forsvaret, Paraguay sine internasjonale relasjonar og Paraguays flagg og våpen.

Opphavleg var guaranítalende folk utbreidd over eit stort område med sentrum omkring Paraná med bielver i Paraguay. Området blei spansk koloni i 1537, då hovudstaden Asunción blei etablert. Paraguay erklærte seg som sjølvstendig nasjonalstat i 1811. Landet blei utover 1800-talet styrt av autoritære leiarar. Den første var José Gaspar Rodríguez de Francia, som omforma Paraguay til ein sjølvforsynt nasjon isolert frå omverda.

Trippelalliansekrigen (1865–1870) resulterte imidlertid i katastrofale økonomiske og sosiale konsekvensar for landet. Første halvdel av 1900-talet var prega av politisk uro med hyppige maktskifte og Chaco-krigen (1932–1935).

General Alfredo Stroessner tok makta ved statskupp i 1954, og styrte landet med jernhand fram til han blei avsett i 1989. Hendinga markerte ein overgang frå det som då var Latin-Amerika sitt eldste militærdiktatur til innføringa av demokratiske reformer. Tiåra etter har vore karakteriserte av høg politisk ustabilitet i eit framleis skjørt demokrati.

• Les meir om Paraguay si historie.

Paraguays bruttonasjonalprodukt (BNP) var i 2023 på 42,96 milliardar amerikanske dollar (USD). Berre fem land i Sør-Amerika hadde i 2023 eit lågere BNP per innbyggjar enn Paraguay, som er eit av dei fattigaste landa i denne verdsdelen. Arbeidsløysa er på 6,1 prosent (2024) og inflasjonen på 4,6 prosent (2023). 24,7 prosent av innbyggjarane lever i fattigdom (2022).

Paraguay er eit utviklingsland med ein marknadsøkonomi karakterisert av ein stor uformell sektor. Jordbruk, småskalaindustri og handel er hovudnæringsvegar, der tenesteyting per 2023 utgjorde den største sektoren med 49 prosent av BNP.

Landets eksport var i 2023 på 18,712 milliardar USD, medan importen var på 17,904 milliardar USD. Med dette hadde Paraguay eit mindre overskot i handelsbalansen. Jordbruksvarer står for om lag 65 prosent av landet sine eksportinntekter, hovudsakeleg soya, kjøt, mais og korn (2023). Økonomien er særs sårbar for svingningar i landbruksproduksjonen og prisar på den internasjonale marknaden. Eit viktig eksportprodukt er elektrisk kraft. Dei tre største eksportmarknadene er Argentina, Brasil og Chile (2023).

Paraguay har slutta seg til det latinamerikanske frihandelssamarbeidet MERCOSUR.

• Les meir om økonomi og næringsliv i Paraguay og om mynt, mål og vekt i Paraguay.

Paraguay si kulturhistorie har element av både spansk og guarani kultur og tradisjon, uttrykt gjennom handverk, kunst, litteratur, musikk, mattradisjonar og ulike lokale skikkar.

Paraguay fekk seint sin eigen litteratur på grunn av urolege politiske tilhøve, og forteljarkunsten i landet kan først seiast å ha nådd eit høgare nivå med Gabriel Casaccia (1907–1980) og Nobelpris-nominerte Augusto Roa Bastos etter andre verdskrig. Paraguay har lange tradisjonar for teater.

Paraguayanske massemedium var under Stroessner-regimet underlagt streng sensur. Frå 1989 har landet hatt pressefridom, sjølv om denne retten i praksis framleis ikkje alltid blir respektert. På Reportere utan grenser sin World Press Freedom Index ligg Paraguay på ein 100. plass (2021). All presse er spanskspråkleg, det finst ikkje aviser på guaraní. Kringkastingsverksemda skjer både på spansk og guaraní. Dei siste åra har uavhengige, politiske internettaviser og bloggar blitt viktige alternativ til den tradisjonelle papirpressa.

Historisk sett har utdanningssystemet i Paraguay vore neglisjert, men har etter at demokratiseringsprosessen tok til, gjennomgått store endringar.

• Les meir om Paraguays litteratur, teater i Paraguay, kunst i Paraguay, skole og utdanning i Paraguay og musikk i Paraguay.

Den bilaterale politiske og handelsmessige kontakten mellom Paraguay og Noreg er sterkt avgrensa. Den norske ambassaden i Buenos Aires er sideakkreditert i Asunción, der det er eit honorært norsk generalkonsulat. Paraguay har heller ikkje ambassade i Noreg. Den næraste er å finne i Stockholm, med sideakkreditering til Oslo.

Norad ga ikkje utviklingsbistand til Paraguay i 2023.

Noreg importerte varer frå Paraguay til ein verdi av 1,1 millionar norske kronar (NOK) i 2024. Eksporten frå Noreg til Paraguay var på 1,7 millionar NOK i 2024. Elkem ASA har ei bedrift (Elkem Silicon Products Limpio) i nærleiken av Ascuión for produksjon av ferrosilisium. Fresco Norway S.A. driv ein plantasje i Paraguay, der det blir produsert makadamianøtter, soya, sorghum og kjøt.

• Sør-Amerika
• sør-amerikanske urfolk
• Sør-Amerikas historie

• Utenriksdepartementets reiseinformasjon om Paraguay
• FN-sambandet: Paraguay
• CIA World Factbook om Paraguay
• World Bank Data: Paraguay
• Norwegian Ministry of Foreign Affairs: Norway in Paraguay
• Utenriksdepartementet – Diplomatiske samband
• Norad
• Statistisk sentralbyrå (SSB). Statistikkbanken