Otne lávvardaga Kárášjoga Beskenjárggas lágiduvvo sámefestivála Beskán Luossa Rock, mii lea sturron mealgat olu jagiid mielde.
Festivála oažžu ođđa jođiheaddji boahtte jagi. Ođđa lágideaddjin šaddá Daniel Reies, gii lea bajásšaddan Beskán Luossa Rock festiválas. Reies lea dál oahppamin ovddeš festiválahoavddas Stig Arne Sombys.
– Dán jagi ii šatta čuoikasafari go ii leat oaggungilvu, muhto don gávnnat várra muhtun čuoikka dán festiválaš. Dat gal lea sihkkar, dadjá Daniel Reies.
Guokte jagi dassái Beskán Luossa Rock ii lágiduvvon ja okta sivva dasa lei ahte Deanusčázádagas luossabivdu lei gildojuvvon, dego dánge jagi.
Loga lasi: Beaskán Luossa Rock ii lágiduvvo
Muhto vaikko stáhta ásahan guolástangildosat figgetge háhttet moarrái, de Sámi festiválageassi ii suige dasa roahppán! Loga baicce vulobealde geasi sámefestiválain!
Ohcejohka šearrá, Ohcejohka 3.–9. suoidnemánu
Kulturvahkus leat hui máŋggalágan dáhpáhusat miehtá vahku Njuorggámis, Gáregasnjárggas ja Ohcejogas, earret eará lihkadanaktivitehtat, kulturdoaimmat ja dieđusge ollu sámemusihkka. Lávvardaga Ohcejogas leat velá sihke Amoc ja Ailu Valle konsearta ja eahkedis DJ Sunna Maaret.
Riddu Riđđu, Gáivuotna 12.–16. suoidnemánu
Riddu Riđđu lea riikkaidgaskasaš álgoálbmotfestivála, mii lea lágiduvvon jahkásaččat Olmmáivákkis jagi 1991 rájes. Lešgo olles geasi bivnnuheamos sámefestivála, gos gávdno hirbmat máŋggabealat prográmma olles bearrašii. Dán jagi mielde lea maid Go_A, Ukraina ovddasteaddji jagi 2021 Eurovisionis.
Márkomeannu, Evenes 27. –30. suoidnemánu
Festivála lágiduvvo Norgga beal Sámis Gállogiettis ja das lea čielga sámi profiila. Dátge festivála lea hui máŋggabealat, eandalit kultuvrra ja dáidaga hárrái. Lávddi alde doppe leat dán geasi earret eará Emil Karlsen, Yungmiqu ja Katarina Barruk.
Ijahis Idja, Anár 18.–19. borgemánu
Eamiálbmogiid musihkkadáhpáhus lea lágiduvvon Anára girkosiiddas jagi 2004 rájes. Festiválas leat earret eará márkanat, njoarostangilvvut ja máŋggat čeahpit sámeartisttat. Bearjadaga lávddi alde leat livžžodeamen earret eará Maxida Märak ja KeiiNO.
Eddemannak, Nesseby 24.–26. borgemánu
Nuorra ja ođđa musihkkafestivála lágiduvvo dán geasi goalmmát geardde Vuonnabađas, seamma vahkkoloahpa go Vuonnamárkanat. Ovdanbuktimin leat máŋggat oahpes sámeartisttat, dego ovdamearkka dihte Intrigue, Felgen Orkester ja Solju.
