Anárlaš Mikko Keränen lea okta sis, gii álggahii davvisámegiela oahpuid Sámi oahpahusguovddážis (SOG) dán čávžža. Keränena eamit ja nieida leaba sápmelaččat ja hállaba ruovttus sámegiella. Son hálida ovddidit su sámegieldáiddu ja lea ilus, ahte viimmat beasai sisa.
– Dalle go ledjen Anára gielddas barggus, gal mun máŋga geardde isken, muhto in beassan, muhto dál lihkostuvven.
Keränen bargá sosiálabargin Lappi buresveadjinguovllus ja hálida maid geavahit sámegiela barggus. Su mielas lea dehálaš, ahte son virgeolmmožin sáhttá fállat bálvalusaid maid sámegillii.
Dál son lea giellahárjehallamis SámiSosteris ja liiko dasa hui olu, go sáhttá geavahit giela.
Giellagurssaide leat olu ohccit
Sámi oahpahusguovddáš fállá iešguđetlágan sámegiela gurssaid. Doppe leat olles jagi bistevaš giellalinnját ja oanehut neahttagurssat. Eandalit davvisámegiela neahttagurssat geasuhit ohcciid.
Ovdamearkan dán jagi davvisámegiela álgogursii ledje ohcan 108 olbmo, geain dušše 15 besse gursii. Anárašgiela álgogursii ledje ohcan 25 ja 15 besse. Nuortalašgiela gaskadási giellagursii ledje ohcan 18 ja dohko válde 15 oahppi.
Jagi bistevaš giellalinnjáide ledje ohcan 31 olbmo lohkanbadjái 2022–2023, ja dohko besse 12 olbmo. Anárašgiela linnjái fas ohce 19:s ja 14:s sis besse.
Váldoálbmot beroštuvvan sámegielas
Sámegiela giellagurssaide ohcet maid olbmot, geain ii leat mangelágan čanastat sámegillii dahje sámevuhtii.
Katri Isokangas lea Oulus eret, ja son lea ovdal vázzán davvisámegiela vuođđooahpuid Giellagas-instituhtas ja hálidii oahppat eanet davvisámegiela.
– Mun álgen studeret davvisámegiella Oulu universitehtas ja go dat lei friija oalgeávnnas, mun liikojin dasa ja hálidin studeret lasi. Válljejin davvisámegiela go leat ollu hállit, muitala Isokangas iežas giellaválljejumis.
Son lea leamaš duđavaš oahpuide ja son sámásta jo vehá, vaikko leamaš SOG gurssas easkka njeallje mánu.
Isokangas lea plánemin dáid oahpuid maŋŋel ohcat Giellagas-instituhtii. Dál son lea hárjehallamis Oulus sámegiel luohkás.
Dán artihkkala lea čállán Katariina Guttorm, gii leamašan Yle Sámis giellahárjehallin dál juovlamánus.