Neahta mohkiid duohken gávdno dál viiddes davvisámegielat digisátnegirji, gos sáhttá gávdnat olu dološ sániid. Sikku Media John Anders Sikku lea čohkken ovtta neahttasiidui viiddes sátneráju, gos leat maid Konrad Nielsen beakkán sátnegirjji dieđut.
Nielsen sátnegirji lea dahkkon 1900-logu álgobealde ja leage máŋgasii dehálaš bargoneavvu.
Sikku Media digisátnegirji lea ain geahččalanveršuvdna, muhto lea goit geavahanláhkai. Sikku lohká iežas leat giellaberošteaddji ja sus leamašan guhká niehkun ráhkadit Nielsen sániin sámegiel sátnegirjeapplikašuvnna.
– Konrad Nielsenh lea čohkken dalle dolin hui olu sámegielsániid ja jorgalahttán daid čilgehusaid dárogillii ja eaŋgalasgillii. Dat lea leamaš guhká dakkár niehku ráhkadit dan sámegiel sátnegirjeáppan, muitala Sikku.
Moadde jagi dassái Sikku fuomášii, ahte materiála gávdno juo digitála hámis, nu ahte son ii dárbbat čohkkát ja čállit.
– De mun lean ožžon daid digitála hámis ja de lea mus leamaš vejolašvuohta ráhkadit neahtasiiddu. Mun áiggun áppaid maid addit olggos dál fargga, gos sáhttá ohcat visot sániid, muitala Sikku.
Fállá applikašuvnnaid nuvttá
Sikku Media lea olggosaddán juo árat sámegiel sátnegirjeapplikašuvnnaid, muhto Sikku lohká, ahte Konrad Nielsena sátnegirji lea eará.
– Dat lea juo ovddalgihtii beakkán, ahte dat lea hui buorre sátnegirji, das leat hui buorit čilgehusat ja das leat hui ollu dološ sánit.
Ođđa neahttasiidui leat vižžon dieđut Ruovttueatnan gielaid dutkanguovddáža (su. Kotimaisten kielten keskus) Álgu-diehtovuođus. Doppe leamašan vejolaš ohcat sániid juo árat, muhto fálaldat ii leamaš nu dovddus ja dat gáibida dárkilvuođa riektačállimiin.
Sikku Media neahttasiiddus eai leat dušše Nielsen sánit, muhto maiddái Pekka Sammallahti suomagielsánit ja Klaus Peter Nickel ja Pekka Sammallahti duiskkagiela jorgalusat, mat leat vižžojuvvon Álgu-diehtovuođus.
– Mun jurddašin mađi eanet, dađi buoret. Mun áinnas bijalin dárogiela maiddái, muhto doppe eai leat dárogielat jorgalusat, muitala Sikku.
Sikkumedia digisátnegirji lea ain geahččalanveršuvdna. Sánit leat ohcamis, muhto geavaheaddji vásáhusa Sikku áigu ain buoridit. Son sávváge, ahte jus olbmot fuomášit boasttuvuođaid, de dieđihit dain sutnje vai beassá divvut.
Sikku Media fállá eanáš applikašuvnnaid nuvttá. Maiddái sátnegirji, mas leat Konrad Nielsen sánit, boahtá leahkit nuvttá. John Anders Sikku muitala iežas bargat prošeavttain ja doarjagiiguin.
– Mun dagan, go ieš dárbbašan dákkáriid, lohká Sikku.